Rev 17 | MHL | STEP | Aria maa unowa nain weesereya wi ensel epira opap ikemik nain oko-ke ekapep efa maakek, “Aria, ekapep era emeria samora nain urufe. O epa eka mane-maneka owow unowa-pa pokap ikua. Ikoka sirirowa samor akena aawinon, nain nefa ofakowinen.

Revelation of John 17

Era emeria samora

1 Aria maa unowa nain weesereya wi ensel epira opap ikemik nain oko-ke ekapep efa maakek, “Aria, ekapep era emeria samora nain urufe. O epa eka mane-maneka owow unowa-pa pokap ikua. Ikoka sirirowa samor akena aawinon, nain nefa ofakowinen. 2 Owow unowa owow saria emeria nain wameiya soma oraimik ne wi mua unowa o wain samora nain wiar enep momorarimik,” naap maek.

3 Ne aria Ewar Eliwa efar oreya mokoka-keriw kirep ikemkun ensel-ke efa pikiwemi epa asia nomon manekiw nan efa wuak. Nan ikok emeria nain urufam. O maa eneka asia mia oka akena iinan-pa pokap ikua. Maa eneka asia nain mia-pa unum samora sira-sira siisimiwkin ikua. Ikiwosa ikur okaiwi-pa erup ne ikiwos suusa ten kuisow onaiya ikua. 4 Emeria nain mia suuwowa oka akena. Ne mia suuwowa nain sii-siisia gol, omod onoma ne nomona eena wili-wiliniya nainiw bala opawamik. O gol urupa opap ikua nain ona enum erua sira-sira nain-ke taanep ikua. 5 Unum oko ona ekima-pariw siisimiwkin ikua. Unuma nain feenap: “Maa kokot-ke. O owow maneka Babilon, wi era emeria ne mua miira patirowa sira-sira onimik nain wiena onak maneka-ke.” Opora naap siisimiwkin ikua. 6 Emeria nain wi Yeesus teeria unow akena wia ifakimemi aka wiar enep enep pepek erap weetak arek, wi eena Yeesus opor makena wiar maem-miemik nain. Yo naap urufap soranep kema unu-unowa wuam. 7 Ne aria ensel-ke efa maakek, “No moram soranep kema unu-unowa wuan? Maa eneka asia ikiwosa ikur okaiwi-pa erup ne suusa ten kuisow nain-ke emeria nain piawem-miawiya. Nain kemena feenap nefa maakinen. 8 No maa eneka urufan nain iiriw imenarek, nain aakisa me ikua. Ne ikoka miiw ona tepak akena-pa urupinon. Ne epa me ekowa iiwawun samorarep mesenalinon. Ne mokomokoka Mua Maneka miiw maa muutitik onak nain onoma wuap ekapep aakisa, wi mua eena unuma anane eliwa ikowa maifa-pa me ikemik, wi nain ikoka maa eneka nain urufap soranep kema unu-unowa wuikuan. Moram maa eneka nain iiriw ikua ne aakisa me ikua ne ikok kiiriw nainiw imenarinon.

9 Maa fain kema pukep amisarowa-ke. Emeria nain ema mokoka gelemutumut nain iinan-pa pokap ikua. Ikiwosa ikur okaiwi-pa erup nain ema mokoka gelemutumut ikur okaiwi-pa erup nain pepekimok. 10 Ne pun owow saria mane-maneka ikur okaiwi-pa erup wia pepekimok. Owow saria ikur iiriw umemik, aakisa kuisow nain-ke kame nain urufam-ikaiya. Ne oko me imenarowa ikua. O imenarinon nain ikok epa eeya me ikainon. 11 Aria maa eneka asia iiriw imenarek, ne aakisa me ikua nain-ke ikoka wi owow saria ikur okaiwi-pa erup nain umiwkin os-ke imenaremi owow saria arinon. Os pun wi teeria nain-ke. Ne lawisik ikok iiwawun mesenalinon.

12 Maa eneka suusa ten kuisow urufan nain wi owow saria ten kuisow ikoka iimarowa nain pepekimok. Wi nain ikoka maa eneka nain wameiya owow saria kekanowa aawikuan. Aawep ama kuisow muuta naap ikaikuan. 13 Owow saria nain unowiya kema kuisow wuap maa eneka nain maneka wuami kekanowa iiwawun iwemi osiw ookikuan. 14 Wi nain-ke ikoka Sipsip Muuka wameiya irakikuan. Sipsip Muuka eena owow mua mane-maneka wiena Mua Maneka ne wi owow saria unowa wiena Saria maneka nain, naapeya wi o wameiya irakiwkin os-ke ona teeria onaiya wia nomakikuan, teeria eena wia pepekimeya ookam-miawemi opora opimik nain.” Naap maek.

15 Aria ensel-ke opora oko pun feenap efa maakek, “Era emeria nain eka mane-maneka-pa pokap ikua, nain feenap, miiw unowa, owow unowa, wi mia sira-sira ne opora aakunowa sira-sira nain wia pepekimok. 16 Suusa ten kuisow ne maa eneka urufan nain-ke ikoka era emeria nain kema bagiwirikuan. Kema bagiwirap samoriwkin o saporma ikok oram pokap ikainon. Naap ikaeya mia oposia wiar enemi mukuna-pa wafuriwkin iiwawun awinon. 17 Moram Mua Maneka-ke ikoka kamenap arowa maek nain onowa wia suuweya naap onamik. Naapeya wi unowiya kema kuisow wuap maa eneka asia nain kekanowa iwemi osiw onikuan. Naap ikok ikok Mua Maneka opora maep-puak nain iiwawun naap wiar imenareya weeserinon. 18 Emeria urufan nain owow manek akena-ke. Nain-ke owow saria unowiya wia urufiya.”